星期一的教育股，昨天的舜宇(2382)，都係非常驚嚇，不過都係源於超級出奇不意，先有咁嘅反應，教育股個政策事前冇發酵過，自然係大反應，舜宇一向咁透明，每個月公佈出貨數字，每個月都唔錯，大家好自然會預盈利一定大升，但最後竟然只升2%，衰啲講，公用股盈利增長都唔止2%呀，無論你是咩特殊原因，點樣同市場解釋都係冇用，現在最得人驚的就是「夢碎」，你突然拍醒咗一班發增長夢的基金，後果就是你昨天看到的。
咁大家就好自然期待今天出業績的騰訊(0700)，會好似早兩日那些股咁差，咁北水都先行一步，凈沽23億，但事實又唔一定PK的，本身市場預期Q2一定差，未到暑假遊戲收入一定唔好，加上騰訊係有出Q1架嘛，並不是舜宇咁半年先話你聽，所以大行不會估得太錯。喂青冰咁你即係睇好啦，呢個又係好好笑，每次騰訊業績，報紙佬都吹到每個月期指結算咁，好淡大決戰，咁你有腦都知，期指不會每個月都決戰吧，騰訊亦一樣，根據過去兩年的季績，並不是次次都有大方向行出來，如果你揸衍生工具的，就要提防咩叫縮窩了。
以為今天一定八號風球，原來起身時乜風球都冇晒，明天的騰訊會否如此呢?
Search